ندي …بقلم منصور عبد المقصود
الليل بيهجم والنجوم شاهدة
اني اكتفيت محايلة ومناهدة
وانا مش راح احلف
ان المطارح مش في روعة مطرحك
لكن الاسى يقتل قلوب شاردة
هتكوا حياء الأرض
ف زرعتلك وردة
عينك يا بنت الامل اللي بتنزف بكا
والا انتي متاخدة
بكرة إن مجاش هيعود
وهتكمل القاعدة
ندى
مرت سنة
ومازلت انا
برسم عيونك فرحانين
يا نهر
م الدمع الحزين
فيضان دموعه بترتعش
مرسوم على جدار الالم
١٠٠ الف وش
مفيهمش وش بيبتسم
ولا بسمة حلوة بتترسم
ونسينا من كتر البكا لون بسمتك
وانا بسألك
جاوبيني انتي بذمتك
ايه اخرة الصمت اللي فارض نفسه على كتف المكان
ليه محرمة صوت الجرس ؟
ومجرمة صوت الادان ؟
ليه شطك الناعم ساحبنا للغرق ؟
مكتوب علينا نفترق
والا انتي بايعة من زمان ؟
من الف عام
وانا برسمك وردة محاوطها عيدان
علشان تصونك
تحرسك
ليه اتحولت فجأة لديدان
تنهش في لحمك تقرصك
يا وردتي عودي كما الزمن الجميل الاولي
نصرخ في وش المعتدي
وإن قالوا عن زمني انقضى
فلتشهدي
اني الفتى الشهم الأبي
ابنك أنا
وابنك معمروش كان غبي
يا وردتي
نادي على النسمة اللي فايتة مروحة
واستأذني منها في حبة طبطبة
كل الوشوش اتغيرت
كل القلوب اتكسرت
والعمر عدا كأنه مشهد مرتجل
والكل ماشي على عجل
والبنت ليلة فرحها مبتتبسمش
والواد في ليلة دخلته
وكأنه بيجر ف حجر
يا الف حصوة في عين ما سمت في النظر
الكل عايش منتظر
يتشال على أكتاف الاربعة
ندي
وان طالت المسافات
سكتنا قادرة تنطوي
وان سرقوا من ليلك قمر
نورك لا يمكن ينطفي
عارفة التاريخ
ليلة ما شمسك شرقت
بقى ينكتب
عارفة أن كدب
كل الكلاب السعرانين
ترفض حروفه تنكتب
يا شمس غلبت شمسها كل الشموس
يا اسم من ماء الدهب
محطوط في قوس
واقف على بابك اسد
في الكبرياء غلب الطاووس
يا احلى كلمة في القاموس الأبجدي
اسمك ندي
ووصفك ندى
يا أم الشموخ السرمدي
التعليقات مغلقة.