ابو مخ تخين ……بقلم وحيد علي الجمال
انا شوفت اللقطه المحذوفه
من غير مونتاج
كان وشك واضح في الصورة
من غير برواز
ماعرفتش أفتش في ملامحك
كان واضح انك مستبعد
ولا يمكن تفضل وتكمل
راح تسمع انك مستهدف
ونادي عليك حاول كمل
الدور وكأنه بيتفصل
من غير كلودور
شكلك مصفر ومتاخد
محتاج دكتور
انا عاذرك طبعا بظْهُورِك
والشك هيفضل في سطورك
فازاي ماعرفتش من نفسك
فن التغفيل
احساسك واضح م الاول
من اول يوم من عم نول
انك دوبلير
و خيالك في القصة البايخة
كان شارب خلطة كوكتيل
صدقني ياصاحبي ماتزعلشي
كلنا دوبلير !؟؟
و مكانك محجوز لك طبعا
من غير ولا تست
حافظين الدور وبتفاصيله
من غير سيناريست
اخترت تزاحم وتعافر
علشان في الاول والاخر
يظهر لك وش
انا كنت المخرج و المنتج
انا كنت البطل المتعافي
مع ثقتي في نفسي مع حضوري
الكاميرا أتوأدت في غروري
عديت وقايست
وف آخر المشهد باركولي
أن انا عجزت
الكلمة اتحاشت في لساني
وكاني في لحظة انا فلست
قبل الكواليس مايفضوها
ألفت انا كام غنوة جديدة
تنفع منولج
يمكن يقبلها المرة دي
واهرب م الموت
عرضوا في الاخر
كام مشهد من غير ولا صوت
الشعر اختلت اوزانه
والكل بيهدم في حيطانه
والسيد بيرم وأخواته
ولحد جاهين
والنجم بيضرب في حصانه
غارز في الطين
واقفين في سرادق لعزاهم
من غير تأبين
تفعيله بتضرب تفعيله
ادخل ياحزين
خدلك م التورته كام حته
اعمل تغير
واخترع الوزن العجلاتي
ألّف دساتير ..!!
ع المسرح لازم تبهرهم
بحوار كداب
وأداءك كان لازم يضمن
فيه استخفاف
يا سلام لو حبة اسفاف
نجمك هيعلم في سماهم
وتكون استاذ
وتبان في حوارك وكلامهم
ابيض شفاف
شعوز في الاخر أفكارهم
أسحر في عيونهم
و اخطفهم من قلب النور
خليك مستور
وكروتك اوعاك تحرقها
لتموت محسور
فرعون أن صدق تمثيلك
هيجبلك فيل
وتهد الكعبة اللي بناها
جدك براهيم
وتخش في دايرة اخترعوها
اسمها تكوين
هتلاقي كتير هيصقفلك
من فرط ضلالة أفكارهم
سماك تنوير
قربت أصدق تمثيلك
ياابو مخ تخين
……………………..
وحيد علي الجمال
التعليقات مغلقة.