وصية حكيم …بقلم زينب عبد الرشيد
لو أهلك عار
لو كانوا مرار
طافح واتكوم على راسك
إوعاك تتعرى
ومنهم تتبرى
دول هما جدورك وأساسك
في البرد غطاك
حضنك ودفاك
ضهرك لو حد في يوم داسك
طولك عرضك
وطنك أرضك
سيفك رمحك قوسك فاسك
في الحر هوا
بلسم ودوا
لو وياهم تبقى الدنيا تحت مداسك
ناسك أهلك
تسيبهم تهلك
دول هما جنودك و حراسك
اسمع يابني
دا أنت عاجبني
خليهم دوم تاج على راسك
دا إل مالوش ناس
دايما ينداس
عيلتك دول شمسك و نبراسك
مهما يكونوا
إوعى يهونوا
سندك هما
عزوة ولمة
توب واتفصل ع مقاسك
إوعاك تتعبهم
أو يوم تغضبهم
دولا الغاليين
هما الباقيين
دنيا وآخرة
دايما نافعين
راح تسأل كيف؟!
إفهم يا حصيف
ربك وصاك
على ذي القربى
لو توصلهم
راح تكسبهم
يا واد اسمع ياد
وكفاية عناد
أهلك يا ضنايا دول مية وزاد
عاود يا امي بكفاية بعاد
ولا ال نقوله تاني هينعاد
ديا وصية
وحكمة جلية
أنا قلت ورزقي على الله
التعليقات مغلقة.