هستيريا بقلم الشاعر / محمد عبد الفضيل
يا سا يكو يا مخي
خدوك في إشتغالة
مجمد مخيخك ومحسوب عوالة
لا ليك أي فكرة ودايما بتكره
في يومك . وبكره
و كل اللي عايش
يبيع الهجايص
يمجد في بغلة فتطلع حمارة
تموت الفوارس
في صمت المجالس
ولا حد حاسس
ولا حد دارس
ولا حد فاهم صحيح العبارة
وتفضل سفنجي
في إيد العتاولة
مفعص . معجن
في من ده وعلي و لا
كأنك بقايا . نفايا الزبالة
تطرقع قنابل
في غزة وبابل
فيطلع جلمبو الإذاعة المخضرم
في شاشة جنابو ويشجب . يقطم
ساعات ع الشاشات
بحرقة وآهات
وبكره . هيصحي يجيب لك كمالة
يا عالم . عوالة
كفاكم مهازل
ما دكو المنازل
ودفنوا البراءة
وماتوا العوازل
وأحيوا الدناءة
وبكره يجيلكم قرار بالإزالة
يا ريختر تعالا
وزلزل مدينتي
وشوف ألف حالة
تصحي في رجولتي
وفين الرجولة
وفين الجرأة
تموت البراءة في توب الندالة
وتحيا الدناءة
وتصبح بطولة
وتحيا اللي هزت وغمزت ورقصت
وتسقط بلادنا بصفقة وعمولة
يا حرة يا أمة جبينك علالي
وعلمك يا بلدي في جبالي وتلالي
يا مصر يا زرعة
جذورها ما تضعف
يا مذكورة دايما في آية ومصحف
تعيشي عزيزة
تموتي إستحالة
تعيشي عزيزة تموتي إستحالة .
التعليقات مغلقة.