زينب … بقلم / وحيد علي الجمال
حدوتة في حضن عيال الدرب
فجر بيشرب عرق امبارح
ليل مغسول بهموم شباك الجارة
توتة جامع أبو البركات
رافضة وجودها لما انبنى للجامع سور……….
دور شطرنج بدايته خسارة
نوبة فشر وكدب و سهرة
يوم مشطوب من بكرة
و ليه قابلاني نبي ومصدقه كذبي
و لما أشاور عليك و أقول إنك قصيدتي ، إنك حقيقتي و معجزاتي
تلعني لحظة ميلادي من عينيك.
و تهجريني في الحواري الضيقين
وأعلن حدادي و أدوس على شمعك
و اتفتت علي كتف النهار
يفتتني شتا مبحوح على صدرك
لساها شبابيكك حضنها الشيش وخجلانه غناويك من بصة الدرويش لساها عيال الحارة سهرانة في ليل فارد جناحاته على عينيك
بيترهنوا بإنك لسه من حقي ،
وإني شاريك من صغري
برج حمامي ما هوش متعود لما الأربع يجي بينام
وهياج البرج ماهوش مرفوض أصل الرفض دا شئ مرفوض
على كيف كيفك عبر قول
طير واتشقلب حط ونط
أبعد عدي حيطان السد.
لكن لما الضملة هتاكل عينك
على برجي لازم هتحط. تتحايل تترجاني أبيع في ولادك
لأجل ما تاخد مني الحب
السرساوي بن الليانة مهش كداب
نتفي ريش الغربة واعملي منه حجاب
وان ايديه نملت وكترت كوابيسي
إرقي حروف القلق واحبسي ضلي
جوايا عرق اتفرد واتمرد على دمي
ياساكنة حواديتي
ومقصقصة سيفي الورق
معكوسة تواريخي
ولا انتي موجة غرق
………..وحيد علي الجمال……….
التعليقات مغلقة.