متخافيش … بقلم أشرف الشناوي شاعر عامية البرامون -المنصوره
متخافيش ابدا ولادك
خافي م الاندال وبس
خافي م اللي يبيعوا عرضك
او يقايضوا بحلم أرضك
متخافيش طول مانتي واقفه
صالبه طولك مين يطولك
دول ولادك
لو ندهتي راح يجولك
خافي بس من الكلاب
اللي رضعوا واللي طفحوا
واللي عاوزينك خراب
متخافيش ابدا ولادك
اللي ضحوا بكل غالي
واللي جابوا الحلم
من جوا الليالي
واللي سدوا الجرح
وبااجمل اغاني
خافي بس النخاسين
اللي تاجروا في كل حاجه
وكل دين
اوعي تقسي في يوم ياسمره
او تدوسي الطيبين
اللي لونهم لون غيطانك
من عرقهم يسقوا طين
اللي زرعوا واللي حصدوا
واللي طحنولك طحين
اللي خلوا الارض جنه
واشتالوكي بالايدين
اللي شالوا الحمل عنك
لما زاد بالجرح همك
هما دول الفلاحين
اللي جابوا الفجر ليكي
لما كان الليل ماليكي
عدوا بيكي
وفضلوا هما الغرقانين
اوعي تقسي في يوم ياسمره
عالغلابه الطيبين
………………..
التعليقات مغلقة.