قبل النت.بقلم.اشرف الشناوي
قبل النت يامحلا العيشه
كنا يادوب نصرف تعريفه
كنا بنضحك كنا بنلعب
وأما نخلص نلقى الليفه
ناخد دش ونرمي هدومنا
جوا الطشت على الطشطيفه
محلا اللمه على الطبليه
تلقى العيش جنب الطعميه
حبة فول بالزيت والدوقه
لقمه جميله ولقمه هنيه
كان الكل بيحضن بعضه
كنت تحس الروح الحلوه
كنت تدوق طعم الحنيه
كنا نشوف العمده فنضحك
وكاننا جوا الحلميه
كنا ننام وقلوبنا دي فاضيه
زى حمام نايم في الغيه
نصحى الصبح اوام نتوضا
نصفي الروح ومعاها النيه
كنا نكمل يومنا اغاني
زى الارض البكر عفيه
قبل النت ماكناش نعرف
غير الحب وضحكه شقيه
كنا بنرسم حلمنا دايما
شمسه وقمره وضله وشجره
وورده بتضحك وسط المطره
بعد النت ماجانا وشرف
عاش الكل ياعيني في صحرا
…
اشرف الشناوي
شاعر عاميه
التعليقات مغلقة.