أوعدوني..
سولافا بسيونى
لو جه يوم
وغبت عنكم
والجفون غطت
عيوني.
أي لحظة
أكيد هتحصل
مش هينقص
شيء بدوني.
الأرض أهي دايره
في مدارها
وفصولها إللي
بيسحروني.
إوعدوني…..
لما تلقوا
الصبح نور
وتسمعوا لحن
الطيور.
أو تلمحوا
نقطة ندى
سايله من
أجمل زهور.
ولا مع الشموسه
تلقوا الدوار
عمال يدور.
أو كروان
بدعاه ينادي
طاير ومعدي
الجسور.
ولا ديك من
بدري صاحي
صوته يجتاز
أي سور.
لما تلقوا
الضي شقشق
والطريق فارش
ورودي.
وقتها افتكروا
إسمي
وإذكروا لحظة
وجودي.
ويا صوت
شتوايه غسلت
بحنانها
كل البيوت.
والشوارع هادية
جدا مايتسمعش
فيها صوت.
لكن دا مش
إسمه موت.
دا الشتا قفل
بيبانا .
وقنديل على
ضيه سهرنا.
و ريحة القهوة
ف بيوتنا داب
في حضرتها
السكوت.
والوقت بيجري
وبيفوت .
والحلم كان
سارق عيوني.
عايزه تاني
وعد منكم
لو صحيتوا
يوم بدوني.
إفتكروني…..
قولوا كات
عاشقه الحياة
همها رضا الإله.
مهما بتدوق
م الألم
عمر ما تسمع
ليها آه.
كانت بتتحدى
الصعاب.
عايشاها من
غير حساب.
لو كل ما
فيها داب.
ساكن جواها
الأمل.
وعشمها في
يوم ما خاب.
قولوا كانت
لينا شمعة.
دوبتها ألف
دمعة.
حضنها حصن
وأمان
ودايما كانت
لينا جامعة.
إفتكروني لما
تلقوا الورد
بيصبح عليكوا.
لما تلقوا البحر
مادد إيده
بيسلم إيديكوا.
لما تلقوا الشمس
نامت والقمر سهر
عنيكوا .
ولا نجمة ليل
تلألأ بضيها
جايه تهاديكوا.
ولا كان في
سهرة حلوة
بالساعات
ولا نوم يجيكوا.
إبقوا ادعو
ليا دعوة
وقلبي هيأمن
عليكوا.
بس لو جه
يوم بدوني.
إبقوا وقتها
إفتكروني
التعليقات مغلقة.