دوِّارَه … شعر حسن أبوعرب
شيخ بعقال وعبايه وشال
بس دماغه دى راكبه شمال
خدعاه صحه وعزوه ومال
قُلنَا دوام الحال دامحال
ليه بتعوم عكس التيار
مانع الخير بقيود و اسوار
كاره الجنه وعاشق النار
دايما متعاص فى الأوحال
طُول م ضماير نايمه وغايبه
جِوَّه الناس الشَّايبَه العايبه
ليه متعلق فى احبال دايبه
وبتحلم وبتبنى آمال
يبنى الدنيا دِى دوِّارَه
صاحِب قصر سَكَن حاره
كان بيتاجر فى خساره
أصبح عبره لغيرُه ياخال
ودى ناس رغم الفقر تمام
ملهاش بيت ولا لاقيه خيام
يوم شبعانه يا ناويه صيام
حامده وراضيه بقرش حلال
فارضَى ياولدى بالمكتوب
واوعاك تبكى على المسكُوب
وانهض يلَّا لربك تُوب
بكره الخير هيبَان له هلال
التعليقات مغلقة، ولكن تركبكس وبينغبكس مفتوحة.