“صيتها ف كل الدنيا ضارب”
شعر سيدة القصاص
بيكِ مصر بتنتصرلما كان الغرب نايم
والحريم مالهمش ذكري
كنت واعية وكنت شاطرة
كنت حتشبثوت ياهانم
كنت مريت وكليو باترا
فاردة نورك ع القمر….
ناي بيعزف ف العمل
شعلة ما تحبش كسل
ف السياسة ف الثقافة
طب صحة فنون لطافة
لؤلؤة بتبرق…خشافة
شفة بتنز ….العسل
عطر ياسمين وانتشر
عمر ما حد عليكِ داس
تاج مرصَّع كل راس
ماسكة ابرة ماسكة شاش
شايلة مقطف شايلة فاس
مسطرين يبني ف أساس
غصن زاين ع الشجر
سمرة بيضة برضه حلوة
والغرام في عنيك غنوة
ليكِ شوط ف الحب أيوه
واللي بيشاهد قوامك
قلبه مسكين يتعصر
ف العلوم خضت التجارب
ف الجيوش جندي ومحارب
صيت ف كل الدنيا ضارب
حوض ومنه الكل شارب
صومعة بتغزل عِبَر
من زمان من عصر خوفو
وقفوا كل الناس يشوفو
لقيوا شمسك اللي طلة
ع الوجود بالعز هلة
فاقت الورد وقطوفه
سيل غلالي بيتبَدر
فلذة من كبدك هديتي
رابطة جرحك بالأمل
مات شهيدك ارتضيتي
مين ها يهرب م الأجل
شاربة نار ابنك وأخوكي
والعواذل… بيهيبوكي
شامخة وكأنك جبل
مهما دمعك ينهمر…
كل بلاد الدنيا شاهدة
انك المرأة الوحيدة
انت بنت مصر صامدة
مؤمنة وعاقلة ورشيدة
جوز عيونك يشهدوا لك
بالجمال قاسية وعنيدة
مِن عَداكِ … بيتكسر
يللا إيدك يابن بلدي
خد بإيدها لعرش نيلك
أحلي ست المصراوية
هي قمرة بتضوي ليلك
إنت من غيرها ف متاهة
إنت من غيرها يا ويلك
زاد لروحك ف السفر…
.
التعليقات مغلقة.