كان منايا… كلمات/ أشرف الشناوى
ياحبيبتي
ماتقوليلي
ايه ناقصنا
عشان نعيش
حب يعني
قلبي لو وزع غرامه
يكفي كل الدنيا ديا
وبيه تعيش
بيت يساعنا
وتوته فارده دراعها برا
وأرض خضرا
وعش ريش
ياحبيبتي قولي يالا
وماتخافيش
لو بأيدي
كنت اجيبلك
عقد لولي من مفيش
بس جيب العبد فاضي
بس باحلم اني اعيش
بكره يمكن
القى حلمي وحلم ليكي
قبل مالصبح اللي عدا
يجي تاني ويناديكي
يمكن القى
ضحكه تايهه جوا حزني
تعدي بيكي
صدقيني نفسي اجيبلك
كل حاجه لو بايدي
ياحبيبتي
العمر بيجري
والحياه شئ مستحيل
كل مارسم حلم بالقي
كلاب بتاكل
في النجيل
والقى روحي برا مني
غصب عني
شايله قلب أخضر قتيل
ياحبيبتي احنا في زمانا
كل شئ أصبح بديل
الف يوسف مات ياحسره
والف ميت مليون
قابيل
كان منايا احبك اكتر
فمتقوليش.. اني عويل
التعليقات مغلقة.