متزعلشي . بقلم .هنا سعد
يا متلون بلون الحزن
والدنيا حواليك ..زاهية
يا مسكّر بيبان الفرح
مرارة الحزن .. مش باقية
ياما دقت فوق الراس
جبال احزان
وقلنا القاضية ..والناهية
ف غمضة عين
جبال مالت
جبال راسية لكن زالت
ودنيتنا بفضل الله
اهي ماشية
لون العتمة
مش لايق على سنك
بياض سنك مع البسمة
يزيحو الهم
اكيد للعتمة دى نهاية
يا واد افهم
واقوم ارسم
شجرة وضلاية
ده حر الشمس مع المغرب
يروح يغرب
ونور البدر يجي قوام
وفوق الخد ضحكاية
شايف نفسك
جرام ف الكون ؟؟!!!
وانت الدنيا مخلوقة علشانك!!!!
لو مرة صديق شانك
أو حبيب بدون ما تحس راح خانك
متزعلشى
حتى لو جرام فى الكون
دا كله يهون
مدام العافيه جوانا
وراحة البال ملازمانا
ولقمة خفيفة على المعدة
بتشبعنا
فمتقولشى
تانى اشمعنا
التعليقات مغلقة.