مدينتي بقلم مسعد البحراوي
على باب مدينتي الفاضله
وقف التاريخ سلم
سجل تراث مليون سنه
ومازال بيتكلم
مدينتي دي مش ممكنه
ووجودها سحر عيون
دا ف حرف صادها الساكنه
حواديت في مد العون
سكـوت لله وبصوا لها
وعيدوا نظركوا من تاني
دي هي الشمس بفصولها
وهي نبضكوا الحاني
دي قلبي لما بيطولها
بترقص بيا ألحاني ..
ويطلع من سكونها غنى
على باب مدينتي
اللي واقف!.. أنا
وحافظ تاريخها شعور مش علام
أموت لاجل منها دا يبقى المنى
إذا كان يوطد حبال السلام
مابين الشعائر… يامحلى الغِنى
على باب مدينتي انكتب معجزات
وكانت آيات بتثبت حاجات
بتسرد كنوز لأرض الكنوز
تقول لايجوز تكون ماضي فات
مدينتي اللي كانت مازالت هنا
على باب مدينتي تشوفوا العجب
أمان الإله بنوره انكتب
في إيه بس أجمل من دا كلام !
مدينتي مدينة كل الأنام
بأمر اللي خلق الأمان والسلام
ياأجمل مدينه وإحنا السبب
بكل السواعد بنصنع هَنا
مدينتي وناسها القلوب مؤمنه
مدينتي الحقيقه ووحي الخيال
التعليقات مغلقة.