مواويل الربيع… بقلم/ أحمد بيضون
موال وماشي في الفيس توك
ياخي توكَّا عليك…
بيقولو عليك إنك مش فاهم في الإتيكيت
بالنعمة يا هانم.. إنجدنا يا بيه
أهو إمتى ازاي وحقَّا ولِيه…
بيقولو نسيم وربيع وزغاريد
واللنبي بيمشي فالشارع زي العفاريت
وعيال حواليه.. عمَّاله تنطيط
أهو كُبَّه تشيلُه وخليهم يعملوا تفحيط
ما تجيش داهية تاخدهم.. ولاد الإيه
بتوع التك تُوك….
واوعاك من مستر إكس
حاسب ياسطى لتاخدلك بوكس
القاشية مَعدن ولوكس اللوكس
يا عم سنقُر بطَّل تنقُر
في الودان..كفاياك عادة زمان
الناس فرحانة.. وحشاها لمة الجيران
وفسيخ ورنجة وريحة ريحَان
وفَحلين بصَل وسريس والبيض ألوان
هيّّ فين بركة زمان
يا ست صابحَه.. فين البوري والملوحة؟
عشان حمادة وفاطنة وتوحهَ؟
وولاد بيغنّوا.. الدنيا ربيع والجو بديع
قفلِّي على كل المواضيع
ما تخفّ شويه يا عمّ التوكّ
وشوية كمان واخزي الشيطان
هعملَّك بلوك….
أهي ناس بتدور عالفرحة وسط الصندوق
وف عالَم تانية عايشينها بومب وصواريخ
دنياهم مفيهاش غير طاخ طوخ طيخ
هيّ الأيام بقى ليها طعم
وجنايني حاسسها غابَه بشَكل مُخيف
والعالم نسيوا الاحتفالات وبتهتف (كفايَه نزيف)
واحنا يدوب بنشمّ نسيم موجوع..
وشوية فلّ وياسمين والّلوز تخاطيف
حدّ يقولِّي؟….
ليه دود القزّ متخبِّي في شرانق
مدفون في ركام وخنادق
وفراشته محبوسة والدبابير طايحة ببنادق
بقى بالذمة ده اسمه ربيع؟
أنا طبعا واقف وبهنّي كل الدنيا
أجراس السلام بترن يا محلاها..
والنَّفس أَهي راضيَه
وغُناي وعصافير الورد فأيَّار شاديَه
وربيعنا فِ يوم هيرقص والعالم يسمع صوته
والقزَّ هيفرد جناحاته وتبقى الأرض حرير
وفراشنا بجماله هيطير
وهنرجع تاني لسُعاد وأسمهان
في البندر وفي الغيطان
وربيعنا هيطوف ويشوف زهرة بيسان…
التعليقات مغلقة.