طوق نجاة
بـ قلم أسـمـاء الـبـيـطـار
لما كنت صُغيرة كنت اي ورقة بمسكها حتى لو كراسة المدرسة لازم تلاقي في أخرها رسمة لريشة طاووس أو أي طائر ،، أو رسمة لضوء شمعة و يمكن لحد دلوقتي كده لو اي حاجة في اديا بحاول اطلع من شكل ،، دا غير إني من صُغري هاوية الكتابة طبعا مش باحتراف و لا حاجة بس كان عندي أجندة صُغيرة بحب اكتب فيها كلمتين حتى لو متضايقة من حاجة .. كنت بحس إنها بطلع كل اللي عندي .
و انت بتكتب و بعد ما بتخلص بتحس إنك مرتاح زي ما تكون حكيت لحد اللي مضايقك .
و كان أبويا الله يرحمه بيشجعني لما أدخل المطبخ و أعمل أي حاجة يقولي بس اعملي و مالكيش دعوة طبعاً كنت بعمل حاجات عجيبة و يمكن تخبطها في الحيطة ترجعلك تاني ههههههههههه بس سبحان الله كان يقولي الله إيه الجمال ده و يُجبر بخاطري و ياكل منها .
الحاجات اللي قولتها دي مش حكايات عني و لا حاجة دي هوايات
بس بحب و أنا بكلمكم أقول حاجة عشتها أو لمساها علشان توصل بصدق .
بستغرب لما بلاقي أم بتعنف حد من ولادها إنه ليه هواية معينه و يمكن بتحرمه منها بحجة إن وقت الدراسة أهم و الحاجات دي كلام فاضي و تقضي على موهبة ..
يمكن تكون مستقبله كله
أو تثقل الدراسة اللي اختارها .
أو تكسر عنده ملل أو حالة نفسية سيئة ممكن يدخل فيها .
أو تحميه من أصدقاء سوء يضيع وقته معاهم .
حاولي تفهمي ولادك لأن دي مَلكه خاصة مش أي حد من الولاد بيمتلكها حاولي تساعدي ابنك و نظمي له وقته بحيث يشبع هوايته اللي ممكن بعد كده تبقى مستقبل و حياة و طوق نجاة لمستقبله كله
و على فكرة الرسمة دي على ثمرة كوسة .
مرة كنت بعملها على شكل قلب
و مرة على شكل الفراشة اللي قدامكم دي .
حتى و أنت بتشتغل حاجة مفروضة عليك هتلاقي نفسك بتمارس هوايتك فيها لأن دي حاجة في دمك .
التعليقات مغلقة.